Миний зорилгын эхний алхам тавигдсан

Миний багаасаа мөрөөдсөн зүйл маань л олон улсын харилцааны мэргэжлээр сурч, гадаад улсуудын хэл, соёл, түүх, ард түмнийг нь судалж, тэдний үндэсний ашиг сонирхлоо тусгасан гадаад бодлогыг нь зөв ойлгосноор Монгол Улстай харилцах харилцааг бүхийл түвшинд сайжруулах юмсан гэж бодсоор байдаг юм. Тийм ч учраас мөрөөдлийнхөө дагуу мөрөөдлөө зорилго болгож амьдралд хэрэгжүүлэхээр Олон Улсын Харилцааны Сургуульд элсэн орж, япон хэлийг сонгон суралцаж байгаад 2008 оны 9 сарын 8-нд оюутан солилцоогоор Их Наран улсад ирснээр - хэрвээ би туйлын зорилгоо Дэлхийн оргил цэг Жомолунгматай зүйрлэвэл энд ирсэн маань тэрхүү агуу Гималайн бэлд очсон шүү гэж өөрийгөө урамшуулмаар санагдлаа.

Энэхүү бичлэгийн учир нь тун удахгүй нутаг буцах шийдвэр гаргасан тул намайг ирж суралцахад гүн туслалцаа үзүүлсэн бүх хүмүүстээ талархлаа илэрхийлэх ёстой учраас Аояама Гакуйн Их Сургуулийн Олон Улсын Солилцооны Төв болон тэтгэлэг олгосон Японы Оюутны Үйлчилгээний Байгууллага (JASSO) - д илгээсэн талархлын бичлэг юм.

Бага байхаасаа л Япон, Монголын түүхэн харилцааг шимтэн уншдаг байсан болохоор ном зохиол дээр бичигдсэнд тулгуурлан хоёр орны ард түмнүүдийн бие биендээ дотно элэгтэй ханддаг байдлыг ойлгосон ч далай тэнгисээр хүрээлэгдэн алслагдсан будааны соёлтой суугуул Япон ард түмэн, эх газрын нүүдэлчин гаралтай Монгол түмнээс соёл, зан заншил, сэтгэхүй, амьдралын хэв маяг болон бүхий л зүйлээрээ ялгаатай байдлыг тухайн нийгэмд нь очиж мэдрэх юмсан гэсэн хүсэл үргэлж толгойд минь эргэлддэг бөгөөд Японд очиж сурах арга замуудыг маш сайн судалж байсан болохоор энэхүү суралцах сайхан боломжийг олгосон Аояама Гакуйн Их Сургуулийнхаа Олон Улсын Солилцооны Төвийн бүх ажилчдад баярласан талархсанаа хамгийн эхэнд хэлэх ёстой. Мөн түүнчлэн Япон бол дэлхийд хоёрдугаарт бичигддэг өндөр хөгжилтэй орон, Токио бол амьдралын өртөг өндөртэйгөөрөө дэлхийд нэгдүгээрт ордог учраас хэдийгээр энд ирж сурах эрхийг туйлын баяртайгаар хүлээж авсан ч хөгжиж буй улсын иргэн миний хувьд санхүүгийн асуудал тулгарсан. Тухайн үед энэхүү хүнд асуудлыг шийдэж тэтгэлэг олгосон Японы Оюутны Үйлчилгээний Байгууллага (JASSO)-д `та бүхэн миний санхүүгийн асуудлыг шийдэж өгснөөр миний бие энэхүү мөнгөний асуудалд санаа зоволгүйгээр хичээлдээ бүх анхаарлаа хандуулах болон Япон улсын гайхамшигтай дурсгалт газруудаар явж их зүйлийг мэдэж сурч, Япон улс, Япончуудын сайхан сэтгэлийг мэдрүүлж, бараг явмааргүй болон дахин ирэх хүслийг төрүүлж өгсөнд үнэхээр их баярласан` гэж хэлмээр байна.　Хэдийгээр миний япон хэлний мэдлэг тааруу байсан хэдий ч суралцах хугацаанд бэрхшээлтэй асуудал огт гарч байгаагүй, харин ч Аояама Гакуйн Их Сургуулийн багш нар нь чадварлаг, мэдлэгтэй хичээлээ хэрхэн заавал оюутнууддаа сонирхолтой байхыг маш сайн мэддэг учраас улам л хичээн суралцах хүсэл сонирхлыг төрүүлсээн. Энэхүү хугацаанд сургуулиас олон маш сайхан арга хэмжээнүүдийг зохион байгуулж солилцооны оюутнуудыг нийгэмтэйгээ улам ч танилцуулж байсан нь богинохон хугацаанд хурдан дасан зохицож, хэн бүхнийг Наритагаас хөөрөх агшинд нулимс унагахаас өөрцгүйд хүргэсэн болов уу...
Зургаан сарын хугацаа үнэхээр хурдан өнгөрсөн ч гэлээ Япончуудын тусархаг сайхан сэтгэл, ажилсаг нямбай байдал нь энэ сайхан арлын оронд заавал дахин эргэн ирж дутуугаа гүйцээж, тусалж дэмжсэн бүх хүмүүсийнхээ ачийг нь хариулахаар сайн үйлийг хийх хэрэгтэй гэдгийг ухамсарлуулж байна.
Би та бүхэнд өртэй... Заавал төлөх болно.

Цагаан Сар

Өнөөдөр буюу 2009 оны 2 сарын 22-ны өдөр золгоогүйгээс л биш Цагаан Сарын баяраа тэмдэглэчихлээ.

Bridge Asia Foundation хэмээх байгууллагаас жил бүр тэмдэглэсээр энэ жил 22-дахь удаагаа тэмдэглэн өнгөрүүлсэн нь энэ болой.

1500-аад зочид цугласны ихэнх нь хятад, солонгос, малайз, вьетнам болон япон мэдээж монголчууд оролцсон өргөн сайхан тэмдэглэн өнгөрүүллээ.

Энэхүү 22-дахь удаагаа зохион байгуулагдсан Цагаан Сарын баярын зохион байгуулах үйл ажиллагаанд энэ жил анх удаагаа Монгол Улсаас төлөөлөл болж байгаадаа маш их баяртай байсан. Тухайн арга хэмжээг зохион байгуулагч Bridge Asia Foundation ч хүртэл маш их ач холбогдол өгч, аль болох олон монголчуудаа урьж арга хэмжээг танилцуулан дараа дараагийн жилээс эх орноо сурталчлах илүү далайцтай арга хэмжээ авахыг санал болгож байсан хэдий ч наймхан монголчууд ирсэн нь, Япон дахь Монголын Элчин Сайдын Яам руу удаа дараа мэйл явуулсан боловч ямар ч хэл сураггүй бөгөөд өнөөдөр Элчин Сайд өөрөө биш юмаа гэхэд нэг ч гэсэн төлөөлөл ирүүлээгүй нь жаахан тиймэрхүү санагдсан.

Гэгээн хайрын өдрийн дурсамж

...Амьд явахыг би бусдад хайраа түгээхийн нэр гэж бодном.

Аз жаргалыг би бусдаас хайр хүлээхийн нэр гэж ойлгоном...

Япон улсын Үндсэн Хууль батлагдсаны 120 жилийн ойн өдөр

2 сарын 11-ний өдөр үндсэрхэг үзэлтэй япончуудын хувьд бол хоёр баяр давхацдаг чухал өдөр юм байна.

1. МЭӨ 660 оны энэхүү өдөр анхны эзэн хаан Жимму Япон улсыг байгуулсан хэмээн тэмдэглэгдсээр ирсэн хэдий ч сурвалж бичигт цөөхөн дурдагдсан болон мэдээлэл хомс байдлаас шалтгаалан домгийн шинжтэй. Тухайлбал: МЭӨ 711 оны 2 сарын 13-нд төрсөн гэдэг ч бас нас бараад дахин МЭӨ 585 оны 3 сарын 11-ний өдөр мэндэлсэн хэмээн тодорхой бус. Мөн Шинтод итгэгчид болохоор Жимму бол нарны охин тэнгэр Аматэрасугийн үр сад ч гэж үздэг. Харин Кожикид тэмдэглэснээр бол 126 насалсан гэнэ. Юутай ч жил бүрийн 2 сарын 11-ний өдөр бол үндэсний баярын өдөр бөгөөд бүх нийтээр амарч, миний очиж үзсэнээр бол Мэйжийн шүтээнд бага, дунд сургуулийн сурагчид ижилхэн хувцсаар жигдрэн янз бүрийн үзүүлбэр тоглож байсан бөгөөд ер нь л хүмүүст эх орноо хайрлах үзлийг тєлєвшүүлэх зорилготойгоор өнгөрөөдөг бололтой.

2. 1889 оны 2 сарын 11-ний өдөр Мэйжийн Үндсэн Хууль батлагдсан бөгөөд дэлхийн хоёрдугаар дайнд ялагдсаны дараа 1946 оны 11 сарын 3-ны өдөр энхийг эрхэмлэсэн үндсэн хуулиар өөрчлөгдөх хүртэл хүчин төгөлдөр үйлчилж байсан.

Харин сониноос Мэйжийн үндсэн хуулийн өдрийг япончуудын үндсэрхэг үзэл сэргэхээс болгоомжлон ач холбогдол өгч тэмдэглэхийг сайшаадгүй гэнэ.